2026ರ ಟಿ20 ವಿಶ್ವಕಪ್ ಟೂರ್ನಿಯಲ್ಲಿ ಭಾರತ ತಂಡ ಭರ್ಜರಿ ಪ್ರದರ್ಶನ ನೀಡಿ ಫೈನಲ್ ಪ್ರವೇಶಿಸಿರುವುದು ದೇಶದ ಕೋಟ್ಯಂತರ ಅಭಿಮಾನಿಗಳಿಗೆ ಸಂತಸದ ವಿಚಾರ. ಆದರೆ ಫೈನಲ್ಗೆ ಮುನ್ನ ತಂಡದೊಳಗೆ ಒಂದು ದೊಡ್ಡ ಚರ್ಚೆ ಹುಟ್ಟಿಕೊಂಡಿದೆ. ಅದು ಯಾರ ಬಗ್ಗೆ ಎಂದರೆ — ಅಭಿಷೇಕ್ ಶರ್ಮಾ.
ಟೂರ್ನಿ ಆರಂಭವಾಗುವ ಮುನ್ನವೇ ಅಭಿಷೇಕ್ ಮೇಲೆ ಬೆಟ್ಟದಷ್ಟು ನಿರೀಕ್ಷೆ ಇತ್ತು. ಐಸಿಸಿ ಟಿ20 ಶ್ರೇಯಾಂಕದಲ್ಲಿ ನಂ.1 ಸ್ಥಾನದಲ್ಲಿದ್ದ ಯುವ ಬ್ಯಾಟ್ಸ್ಮನ್ ಎನ್ನುವ ಹೆಗ್ಗಳಿಕೆಯಿಂದ ಅವರು ಮೈದಾನಕ್ಕಿಳಿದಿದ್ದರು. ಆದರೆ ನಿರೀಕ್ಷೆಗೂ ವಾಸ್ತವಕ್ಕೂ ನಡುವೆ ದೊಡ್ಡ ಅಂತರ ಕಾಣಿಸಿಕೊಂಡಿದೆ.
ಈ ಆವೃತ್ತಿಯಲ್ಲಿ ಒಂದು ಪಂದ್ಯವನ್ನು ಹೊರತುಪಡಿಸಿದರೆ ಉಳಿದ ಪಂದ್ಯಗಳಲ್ಲಿ ಅವರ ಬ್ಯಾಟ್ ನಿಂದ ರನ್ ಹರಿದು ಬಂದಿಲ್ಲ. ಸೂಪರ್ 8 ಹಂತದಲ್ಲಿ ಜಿಂಬಾಬ್ವೆ ವಿರುದ್ಧ ಅರ್ಧಶತಕ ಬಾರಿಸಿದದ್ದು ಮಾತ್ರ ಅವರ ಸಾಧನೆ. ಇಲ್ಲದಿದ್ದರೆ ಮೂರು ಬಾರಿ ಶೂನ್ಯಕ್ಕೆ ಔಟಾಗಿರುವುದು, ನಾಲ್ಕು ಬಾರಿ ಸ್ಪಿನ್ನರ್ಗಳಿಗೆ ವಿಕೆಟ್ ಒಪ್ಪಿಸಿರುವುದು ಅಭಿಮಾನಿಗಳಲ್ಲಿ ಅಸಮಾಧಾನ ಮೂಡಿಸಿದೆ.
ಸೆಮಿಫೈನಲ್ ಪಂದ್ಯದಲ್ಲಿ ಇಂಗ್ಲೆಂಡ್ ವಿರುದ್ಧ ಮತ್ತೊಮ್ಮೆ ವೈಫಲ್ಯ. ಕೇವಲ 9 ರನ್ ಗಳಿಸಿ ವಿಲ್ ಜ್ಯಾಕ್ಸ್ ಬಲೆಗೆ ಸಿಲುಕಿದರು. ಎರಡನೇ ಓವರ್ನಲ್ಲೇ ಔಟ್ ಆಗಿದ್ದು ತಂಡಕ್ಕೆ ಆರಂಭದಲ್ಲೇ ಒತ್ತಡ ತಂದಿತು. ದೊಡ್ಡ ಪಂದ್ಯಗಳಲ್ಲಿ ದೊಡ್ಡ ಆಟಗಾರರು ಕಾಣಿಸಿಕೊಳ್ಳಬೇಕು ಎಂಬ ಅಭಿಪ್ರಾಯ ಈಗ ಎಲ್ಲೆಡೆ ಕೇಳಿಬರುತ್ತಿದೆ.
ಈ ಹಿನ್ನೆಲೆಯಲ್ಲೇ ಭಾರತದ ಮಾಜಿ ನಾಯಕ ಸುನಿಲ್ ಗವಾಸ್ಕರ್ ತಮ್ಮ ಸ್ಪಷ್ಟ ಅಭಿಪ್ರಾಯವನ್ನು ಹೊರಹಾಕಿದ್ದಾರೆ. ನರೇಂದ್ರ ಮೋದಿ ಕ್ರೀಡಾಂಗಣದಲ್ಲಿ ನ್ಯೂಜಿಲೆಂಡ್ ವಿರುದ್ಧ ನಡೆಯಲಿರುವ ಫೈನಲ್ ಪಂದ್ಯದಲ್ಲಿ ಕಳಪೆ ಫಾರ್ಮ್ನಲ್ಲಿರುವ ಅಭಿಷೇಕ್ ಶರ್ಮಾವನ್ನು ಕೈಬಿಡಬೇಕೆಂದು ಅವರು ಹೇಳಿದ್ದಾರೆ.
“ಐಸಿಸಿ ಶ್ರೇಯಾಂಕದಲ್ಲಿ ನಂ.1 ಇದ್ದರೂ, ಮೈದಾನದಲ್ಲಿ ಅದನ್ನು ಸಾಬೀತುಪಡಿಸಬೇಕು. ಒಂದೇ ರೀತಿಯ ತಪ್ಪುಗಳನ್ನು ಪುನರಾವರ್ತನೆ ಮಾಡುತ್ತಿರುವುದು ಕಳವಳಕಾರಿ” ಎಂದು ಗವಾಸ್ಕರ್ ಕಿಡಿಕಾರಿದ್ದಾರೆ. ಅವರ ಮಾತು ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ.
ಅಭಿಷೇಕ್ ಶರ್ಮಾ ಪದೇ ಪದೇ ಒಂದೇ ಪ್ರದೇಶದಲ್ಲಿ ಔಟಾಗುತ್ತಿರುವುದು ತಾಂತ್ರಿಕ ದೋಷವೋ? ಅಥವಾ ಒತ್ತಡದ ಪರಿಣಾಮವೋ? ಈ ಪ್ರಶ್ನೆ ಕ್ರಿಕೆಟ್ ವಿಶ್ಲೇಷಕರನ್ನೂ ಕಾಡುತ್ತಿದೆ. ಸ್ಪಿನ್ನರ್ಗಳ ವಿರುದ್ಧ ಆತ್ಮವಿಶ್ವಾಸ ಕೊರತೆ ಸ್ಪಷ್ಟವಾಗಿ ಗೋಚರಿಸುತ್ತಿದೆ.
ಟೂರ್ನಿ ಆರಂಭವಾದಾಗಿನಿಂದಲೂ ಅಭಿಷೇಕ್ ಮೇಲೆ ಭಾರೀ ನಿರೀಕ್ಷೆ ಇತ್ತು. ಪವರ್ಪ್ಲೇನಲ್ಲಿ ವೇಗದ ಆರಂಭ ನೀಡುವ ಸಾಮರ್ಥ್ಯ, ಆಕ್ರಮಣಕಾರಿ ಶೈಲಿ — ಎಲ್ಲವೂ ಅವರಲ್ಲಿದೆ. ಆದರೆ ಮಹತ್ವದ ಪಂದ್ಯಗಳಲ್ಲಿ ಅದನ್ನು ಅನ್ವಯಿಸದಿರುವುದು ತಂಡದ ಸಮತೋಲನಕ್ಕೂ ಹೊಡೆತ ನೀಡಿದೆ.
ಈ ಪರಿಸ್ಥಿತಿಯಲ್ಲಿ ಗವಾಸ್ಕರ್ ಪರಿಗಣಿಸಿರುವ ಪ್ರಮುಖ ಆಯ್ಕೆ — ರಿಂಕು ಸಿಂಗ್. ರಿಂಕು ಸಿಂಗ್ ತಂಡಕ್ಕೆ ಹೊಸ ಶಕ್ತಿ ನೀಡಬಲ್ಲ ಆಟಗಾರ. ಒತ್ತಡದ ಪರಿಸ್ಥಿತಿಯಲ್ಲಿ ಶಾಂತವಾಗಿ ಆಟ ಮುಗಿಸುವ ಸಾಮರ್ಥ್ಯ ಅವರಿಗೆ ಇದೆ.
“ರಿಂಕುಗೆ ನಂಬಿಕೆ ಇದೆ. ಕೆಲವೊಮ್ಮೆ ಕೆಲ ಆಟಗಾರರಿಗೆ ಎಲ್ಲವೂ ಸರಿಯಾಗುತ್ತದೆ,” ಎಂದು ಗವಾಸ್ಕರ್ ಹೇಳಿದ್ದಾರೆ. ಅವರ ಈ ಹೇಳಿಕೆ ಅಭಿಮಾನಿಗಳಲ್ಲಿ ಚರ್ಚೆ ಹುಟ್ಟುಹಾಕಿದೆ.
ಇನ್ನು ಓಪನಿಂಗ್ ವಿಭಾಗದಲ್ಲೂ ಬದಲಾವಣೆ ಸಾಧ್ಯತೆ ಇದೆ.
ಇಶಾನ್ ಕಿಶನ್ ಹಾಗೂ ಸಂಜು ಸ್ಯಾಮ್ಸನ್ ಜೋಡಿ ಫೈನಲ್ನಲ್ಲಿ ಇನಿಂಗ್ಸ್ ಆರಂಭಿಸಬಹುದು ಎಂಬ ಅಭಿಪ್ರಾಯ ವ್ಯಕ್ತವಾಗಿದೆ. ಇಬ್ಬರೂ ಆಕ್ರಮಣಕಾರಿ ಶೈಲಿಯ ಆಟಗಾರರು. ಆರಂಭದಲ್ಲೇ ರನ್ಗಳ ವೇಗ ಹೆಚ್ಚಿಸುವ ಸಾಮರ್ಥ್ಯ ಇವರಲ್ಲಿದೆ.
ಫೈನಲ್ ಪಂದ್ಯ ನಡೆಯಲಿರುವ ನರೇಂದ್ರ ಮೋಡಿ ಸ್ಟೇಡಿಯಂ ದೊಡ್ಡ ಬೌಂಡರಿಗಳಿಗಾಗಿ ಪ್ರಸಿದ್ಧ. ಇಲ್ಲಿ ಬ್ಯಾಟ್ಸ್ಮನ್ಗಳಿಗೆ ಮಾತ್ರವಲ್ಲ, ಸ್ಪಿನ್ನರ್ಗಳಿಗೂ ಸಹಾಯ ಸಿಗುತ್ತದೆ. ಈ ಕಾರಣಕ್ಕಾಗಿ ಬೌಲಿಂಗ್ ವಿಭಾಗದಲ್ಲೂ ಬದಲಾವಣೆ ಚರ್ಚೆಯಲ್ಲಿದೆ.
ಸ್ಪಿನ್ ಮಾಂತ್ರಿಕನೆಂದು ಕರೆಯಲ್ಪಡುವ ವರುಣ್ ಚಕ್ರವರ್ತಿ ಈ ಟೂರ್ನಿಯಲ್ಲಿ ನಿರೀಕ್ಷಿತ ಮಟ್ಟದಲ್ಲಿ ಪ್ರದರ್ಶನ ನೀಡಿಲ್ಲ. ಸೆಮಿಫೈನಲ್ನಲ್ಲಿ ನಾಲ್ಕು ಓವರ್ಗಳಲ್ಲಿ 60ಕ್ಕೂ ಹೆಚ್ಚು ರನ್ ಬಿಟ್ಟುಕೊಟ್ಟಿದ್ದು ಆತಂಕಕಾರಿ.
ಸೂಪರ್ 8 ಹಂತದಿಂದಲೂ ಬಲಿಷ್ಠ ತಂಡಗಳ ವಿರುದ್ಧ ಅವರು ದುಬಾರಿಯಾಗಿದ್ದಾರೆ. ಆತ್ಮವಿಶ್ವಾಸ ಕುಂದಿರುವ ಲಕ್ಷಣಗಳು ಗೋಚರಿಸುತ್ತಿವೆ.
ಈ ಹಿನ್ನೆಲೆಯಲ್ಲೇ ಕುಲದೀಪ್ ಯಾದವ್ ಅವರನ್ನ ತಂಡಕ್ಕೆ ಸೇರಿಸಿಕೊಳ್ಳುವ ಸಾಧ್ಯತೆ ಹೆಚ್ಚಿದೆ. ಸಮತಟ್ಟಾದ ಪಿಚ್ನಲ್ಲೂ ಚೆಂಡನ್ನು ತಿರುಗಿಸುವ ಸಾಮರ್ಥ್ಯ ಕುಲ್ದೀಪ್ಗೆ ಇದೆ. ದೊಡ್ಡ ಮೈದಾನದಲ್ಲಿ ಅವರ ಸ್ಪಿನ್ ಪರಿಣಾಮಕಾರಿ ಆಗಬಹುದು ಎಂಬ ಲೆಕ್ಕಾಚಾರ ತಂಡದೊಳಗಿದೆ.
ಇದೀಗ ಪ್ರಶ್ನೆ ಏನೆಂದರೆ — ತಂಡ ನಿರ್ವಹಣೆ ದೊಡ್ಡ ಪಂದ್ಯಕ್ಕೂ ಮುನ್ನ ಇಂತಹ ಬದಲಾವಣೆ ಮಾಡಲು ಧೈರ್ಯ ತೋರಿಸಬಹುದೇ? ಅಥವಾ ಈಗಿನ ಕಾಂಬಿನೇಶನ್ನ್ನೇ ಮುಂದುವರಿಸಬಹುದೇ?
ಫೈನಲ್ ಪಂದ್ಯ ಎಂದರೆ ಕೇವಲ ಆಟವಲ್ಲ, ಮಾನಸಿಕ ಯುದ್ಧವೂ ಹೌದು. ಒತ್ತಡವನ್ನು ನಿಭಾಯಿಸುವವರು ಮಾತ್ರ ಟ್ರೋಫಿ ಎತ್ತುತ್ತಾರೆ. ಅಭಿಷೇಕ್ ಶರ್ಮಾಗೆ ಮತ್ತೊಮ್ಮೆ ಅವಕಾಶ ನೀಡಿದರೆ ಅದು ಅವರಿಗೊಂದು ಜೀವನ್ಮರಣದ ಪಂದ್ಯವಾಗಬಹುದು. ಯಶಸ್ವಿಯಾದರೆ ಎಲ್ಲ ಟೀಕೆಗಳಿಗೆ ಉತ್ತರ. ವಿಫಲವಾದರೆ ಭವಿಷ್ಯ ಪ್ರಶ್ನಾರ್ಥಕ.
ಭಾರತ ತಂಡ ಫೈನಲ್ ಪ್ರವೇಶಿಸಿರುವುದೇ ದೊಡ್ಡ ಸಾಧನೆ. ಆದರೆ ಟ್ರೋಫಿ ಗೆಲ್ಲಲು ಸರಿಯಾದ 11 ಆಟಗಾರರ ಆಯ್ಕೆ ಅತ್ಯಗತ್ಯ. ಪ್ರತಿಯೊಂದು ನಿರ್ಧಾರವೂ ಪಂದ್ಯ ಫಲಿತಾಂಶವನ್ನು ಬದಲಾಯಿಸಬಲ್ಲದು.
ಭಾನುವಾರದ ಮಹಾಯುದ್ಧಕ್ಕೆ ಕೌಂಟ್ಡೌನ್ ಆರಂಭವಾಗಿದೆ. ನ್ಯೂಜಿಲೆಂಡ್ ವಿರುದ್ಧದ ಅಂತಿಮ ಸಮರದಲ್ಲಿ ಯಾರು ಕಣಕ್ಕಿಳಿಯುತ್ತಾರೆ? ಅಭಿಷೇಕ್ ಮುಂದುವರಿಯುತ್ತಾರಾ? ರಿಂಕು ಸಿಂಗ್ ತಂಡ ಸೇರುತ್ತಾರಾ? ಕುಲ್ದೀಪ್ಗೆ ಅವಕಾಶ ಸಿಗುತ್ತದೆಯೇ?
ಈ ಪ್ರಶ್ನೆಗಳ ಉತ್ತರ ಫೈನಲ್ ದಿನವೇ ಸಿಗಲಿದೆ. ಆದರೆ ಒಂದು ವಿಷಯ ಖಚಿತ — ಈ ಪಂದ್ಯ ದೇಶದ ಕ್ರಿಕೆಟ್ ಇತಿಹಾಸದಲ್ಲಿ ಮರೆಯಲಾಗದ ಅಧ್ಯಾಯವಾಗಲಿದೆ.